جزءٌ من كلمة الإمام الصادق المهدي في المؤتمر الصحفي رقم 70

 

 

من كلمة الإمام الصادق المهدي في المؤتمر الصحفي رقم 70

جزءٌ من كلمة الحبيب الإمام الصادق المهدي حفظه الله ورعاه زعيم حزب الأمة القومي وإمام أنصار الله ورئيس الوزراء الشرعي والمنتخب للسودان في المؤتمر الصحفي رقم 70 الذي انعقد بدار الأمة بأمدرمان يوم الخميس 18 مايو 2017 تحت عنوان: إستراتيجية الحزب للسلام العادل الشامل والحوكمة الديمقراطية.. أسئلة الراهن وآفاق المستقبل…

نُشر الفيديو في العربي الجديد

فيما يتعلق بترمب، مقابلة ترمب، الحقيقة أنا بعتقد الكلام دة في سبيله في عقبات. أول حاجة ترمب دة دلوقت تحت التحقيق، هو ذاتو. هو ذاتو تحت التحقيق. وفي كلام كثير جداً عن أنه جايز يُحاكم، لأنه هو في إتهام ليهو أنه عرقل العدالة، يعني أنه في تحقيق ماشي مع الموظفين الكبار معاه، هو لما رفد كومي دة، لمن رفده دة اعتبر جزء من هذه العرقلة. القضية دي قضية مُهمة جداً لأنه معاها الموضوع بتاع إتهام بالتدخل والتداخل والتعاون مع الروس، مع روسيا، ودة فيه إتهام بخيانة. يعني في مشكلة كبيرة جداً متعلقة بالموضوع دة. وهو جاي حقيقةً إلى هذا الإجتماع، مؤكد يعني أمريكا ليها حق أنها تتعاون مع دول المنطقة وفي مصالح مشتركة، ومافي شك أنه في أمريكا بيُعتبر أى لقاء بين ترمب والرئيس السوداني مخالفة، لأنه سياسة الولايات المتحدة مع أنه الولايات المتحدة ما عضو في المحكمة الجنائية، أمريكا ما عضو في المحكمة الجنائية لكن بتُراعي تقدير المحكمة الجنائية، عشان كدة هم عندهم سياسة، أى واحد عنده تُهمة من المحكمة الجنائية، أمريكا ما بتطبع العلاقة معاه.

عشان ما نعقد مشاكلنا الداخلية نحنا نقول السودان عنده مشاكل حدود، في إطار التصالح البيحصُل والعمل التوفيقي السوداني البيحصُل، نضع إستراتيجية للتعامل مع مشاكل الحدود كلها، ما نفرق دي ولا دي لأنه دة بيبقى كأنما نحنا بس بنميز واحدة لأنه في خلاف سياسي دلوقت. أنحنا عارفين إنه في مشاكل سياسية دلوقت ما بين مصر والسودان ومتصاعدة. أنحنا نقول، دلوقت نحنا، كسودان… نحنا عملنا ورشة عشان نناقش العلاقات السودانية المصرية وطلعنا فيها بيان وحضراتكم بتكونوا تابعتوه. لكن بالنسبة لينا ما نفرد قضية واحدة، قضايا السودان في الحدود كثيرة وهى في رأيي ما مناسبة لتصعيد أى واحدة من ديل لغاية ما نصل نحنا السودانيين لرؤية مشتركة، ومن مُنطلق الرؤية المشتركة دي نحنا نتفاهم مع جيرانا بصورة سلمية عشان نصل لحل لهذه القضايا. اصلو العالم فيهووسائل كثيرة جداً للعلاج السلمي، لكن ما نفرد واحدة من قضايا الحدود ونعتبر أن هى الكل في الكل، لأنه دة بيبقى فيه حقيقةً خطأ، الصح أننا نحنا نقول نعم عندنا مشاكل حدود الآن في السودان ومشاكل الحدود دي تقتضي حلاً.