روائع الحقيبة ومشاهدٌ من أُمسية الشاعر خليل فرح

 

 

روائع الحقيبة ومشاهدٌ من أُمسية الشاعر خليل فرح
 
*******
 
حضر الحبيب الإمام الصادق المهدي زعيم حزب الأمة القومي وإمام أنصار الله والحبيبة الدكتورة مريم المنصورة الصادق المهدي نائبة رئيس حزب الأمة القومي حفظهما الله ورعاعمها، حضرا ليلة الشاعر خليل فرح في أُمسية من أُمسيات الفن والجمال والإبداع بمهرجان روائع الحقيبة التي كانت مشهودة بحضور لفيف من الفنانين والمثقفين والمهتمين بالموسيقى وغناء الحقيبة. كان ذلك في أُمسية يوم الإثنين 20 مارس 2017 وأحيا الليلة كورال كلية الموسيقى والدراما الذين قدموا مقاطع من الأنغام الجميلة من ما كتب الشاعر الراحل من أُغنيات، ومنها…

 
 
عزة في هواك للشاعر خليل فرح
 
*******
 
عزة في هواك عزة نحن الجبال
وللبخوض صفاك عزة نحن النبال
عزة ما بنوم الليل محــــال
وبحسب النجوم فوق الرحال
خلقة الزاد كمل وأنا حالي حال
متين أعود أشوف ظبياتنا الكحال
عزة ما سليت وطن الجمــال
ولا أبتغيت بديل غير الكمــال
وقلبي لي سواك ما شفتو مال
خذيني باليمين وانا راقد شمال
عزة ما نسيت جنــة بلال
وملعب الشباب تحت الظلال
ونحن كالزهور فوق التلال
نتشابي للنجوم وانا ضافر الهلال
عزة جسمي صار زي الخلال
وحظي في الركاب صابه الكلال
وقلبي لسه ما عرف الملال
أظنه ود قبيل وكريم الخلال
عزة ما أشتهيت نوم الحجال
ولا السوار بكي في يمينا جال
وعزة في الفريق لي ضيق مجال
قبيلة بت قبيل ملأ الكون رجال
عزة شفت كيف نهض العيال
جددوا القديم تركوا الخيال
روحك أم سماح سري كالسيال
شجوا الفؤاد حيوا محسور الليال
عزة في الفؤاد سحرك حلال
ونار هواك شفا وتيهك دلال
ودمعي في هواك حلو كالزلال
تزيدى كل يوم عظمة ازداد جلال
عزة في حذا الخرطوم قبال
وعزة من جنان شمبات حبال
وعزة لي ربوع ام در جبال
وعزة في الفؤاد دوا يشفي الوبال
 
 
 
*******
 
 
 
الشرف الباذخ للشاعر خليل فرح
 
*******
 
نحن ونحن الشرف الباذخ
دابي الكر شباب النيل
قوم وم كفاك يا نايم
شوف شوف حداك يا لايم
مجدك ولي وشرفك ضل
إمتي تزيد زيادة النيل
نحن نطارد العنزة الفاردة
نحن نزود مشارع النيل
نحن برانا نحمي حمانا
نحن نموت ويحيا النيل
ما بنندس ما بنتوصي
نحن نكيل برانا نشيل
نحن الطينة ومطر العينة
نحن الوادي برقه يشيل
نحن الصولة سيوف الدولة
نحن كنانة اسماعيل
بابه العالي وشرفه الغالي
كان لجدودنا ظله ظليل
يا حكامنا جيبوا البينه
ولا انقرعوا كفوا الشينه
ده ود عمي وده ضريب دمي
انت شنو طفيلي دخيل
يا نزلانا أمرقوا الذمة
كيف ينطاق هوان الأمة
شالوا حقوقنا وزردوا حلقونا
ديل عاوزين دمانا تسيل
من تبينا قمنا ربينا
ما اتفاسلنا قط في قليل
ما فيش تاني مصري سوداني
نحن الكل ولاد النيل
 
 
 
*******
 
 
ود مدني للشاعر خليل فرح
 
*******
 
 
ما له اعياه النضال بدني
روحي ليه مشتهيه ود مدني
ليت حظي سمح واسعدني
طوفه فد يوم بي ربوع مدني
كنت أزوره ابويا ود مدني
واشكي ليه الحضري والمدني
آه علي حشاشتي ودجني
وحنيني ولوعتي وشجنى
دار ابويا ومتعتي وعجني
يا سعادتي وثروتي ومجني
حين سألنا حاوي الوصب
من خمايل قرية القصب
قالوا جات سيرتك علي النصب
ونحن بين الروضة والقصب
صنفه بعرها قالن إن تصب
تربط الأحلام مع الخصب
كان حبيبنا وحاشا ما نصبي
ومن زمان فارقنا وهو صبي
تاني ما سمعنا انقطع خبره
يا حليلم طشوا ما اتخبروا
واحدة فيهن قالت انجبروا
فقر ابونا
وخدمة النبرو
الكنانة أكرمت نزلي
واغدقت من خيره كل زلي
إن حييت أو مت في الازل
ده مقدر طبعه في الازل
غايته بختم نفثتي الخطرت
بي تحية من حشاي شطرت
للتدور والطايره والما طارت
وسلاما ما الغصون خطرت
 
 
 
*******
 
 
ميل واعرض للشاعر خليل فرح
 
*******
 
 
مـيـل و اعـرض كـتِّر امراضي بِـي هـواكم والـهوان راضي
جُـنَّ لـيلي و هـاجت اعـراضي سَـحَّ دمعي و طاشت اغراضي
هـذا بعـض الـبَيْ عـدا امراضي وانت داري وراضي ماك راضي
بـالـي جـسمي ومن زمان قاضي هـاهو حُـبّك بـين انـقاضي
هـدِّي روعـك اوعـي لا تقـاضي مـا بشارعك مـابكوس قاضي
المـضـلِّـل رُشــدي يـاهـادي والمـكـتِّر في الغضي سهادي
الجـبـيـن الـفـي الظـلام هادي والقـوام السـيدو متـهـادي
يا حـبـيـبي فـيـم تـهـديـدك كـل عذابي و هجري ما بفيدك
روحي في ايدك ضاعت وحات ريدك كـيف ضـاعت يـاسلام ايدك
 
 
 
*******
 
 
 
تم دور وادور للشاعر خليل فرح
 
 
*******
 
 
تم دور وادور
عم نوره شال
فات الحله نور
زي بدر التمام
واحدين قالوا نور
واحدين قالوا دوب
مروي ما بتنور
زي بدر التمام
مين يقوم يتهور
يبري القيف هناك
تحته الدابي كور
زي بدر التمام
قالوا الكون اتطور
لا عاشق عفيف
لا جميل إتصور
زي بدر التمام
الحسود يتضور
ناره ماكله لسانه
كله زور ومزور
زي بدر التمام
الطريق الحور
دمي ما بروح
سيدة ليش يتجور
زي بدر التمام
هز شوقي وتور
يا نديم إزاي
جرحي المخفي غور
زي بدر التمام
يا قليب إتجبر
قوم وريني كيف
الكرام تتصبر
زي بدر التمام
نحن ما بنتعبر
النفوس أن حبت
تستحى وتتكبر
زي بدر التمام
ما خبير أتخبر
في الزمان الفات
والجديد إدبر
زي بدر التمام
أوعي لا تتشبر
هل رأيت لك عاشق
بالغرام يتنبر
زي بدر التمام
نحن ما بنطفر
ما بنهاب سفيه
إلا ما بنتزفر
زي بدر التمام
قولوا لي البتنفر
ما شالن قناع
المعاك تتوفر
زي بدر التمام
يا زميل إتشطر
شن بتشوف حداك
إلا حور مبطر
زي بدر التمام
يبقي يومنا مطر
ماله الكون دهين
والفريق معطر
زي بدر التمام
النحر مغمر
والسباته حارة
والمجال مضمر
زي بدر التمام
الشعر مخمر
يرشح كله ند
عردب المجمر
زي بدر التمام
قام محمد بشر
هز فوق تيجانن
سل سيفه وكشر
زي بدر التمام
قول معاي وإتفشر
نحن سياج عروضن
نحن يوم المحشر
زي بدر التمام
يا حسن اتذكر
طيب ليلتنا ديك
والصباح السكر
زي بدر التمام
المدام ما اتنكر
لا من ديكنا صاح
فوق رؤوسنا اتحكر
زي بدر التمام
كل شىء مفسر
ما في شىء غريب
والعسير ميسر
زي بدر التمام
ما في عين تتحسر
دام عريسنا دام
والحسود إتحسر
زي بدر التمام
 
*******
 
 
ما هو عارف قدموا المفارق للشاعر خليل فرح
 
 
*******
 
 
ماهو عارف قدمه المفارق
يا محط آمالي السلام
في سموم الصيف لاح له بارق
لم يزل يرتاد المشارق
كان مع الأحباب نجمه شارق
ماله والأفلاك في الظلام
يا دهر أهوالك تسارق
منها كم كم شابت مفارق
ما علينا الفات كله فارق
رقنا وله نعيد الملام
من حطامك أنا غصني وارق
في شن أبقيت للطوارق
غير قليبا في همومه غارق
ولسانا برده الكلام
ويح قلبي الما انفك خافق
فارق ام درمان باكي شافق
يا أم قبايل ما فيك منافق
سقي أرضك صوب الغمام
يا بلادي كم فيك حاذق
غير الهك ما أم رازق
من شعاره دخول المأزق
يتفاني وشرفك تمام
مسرح الغزلان في الحدايق
والشوارع الغر والمضايق
قول لي كيف أمسيت دمت رايق
دام بهاك مشمول بالنظان
مجلس اللذات في النمارق
والترف لا زال وصفه خارق
ضاري حسك فاح جانا مارق
وله قاطعو الريح ما هو لام
في يمين النيل حيث سابق
كنا فوق أعراف السوابق
الضريح الفاح طيبه عابق
السلام يا المهدي الإمام
أين مني الودعته شاهق
باكي ناهد لسه مراهق
عيني ما بتشوف الا شاهق
أين وجه البدر التمام
أين مني الفي زهوه باسق
في شبابه نقي من مفاسق
بين ثيابه البيض المناسق
حولك اشبه رتل الحمام
يا بريد الجو فوقي حالق
ميل علي الروح ليها خالق
عدت سالم قول وأنت عالق
مقرن النيلين كيلو كام
الحبايب لفتوا الخلايق
بيني وبينهم قطعوا العلايق
ان دلال ان تيه كله لا يق
نحن ما مجينا الخصام
يا جميل يا نور الشقايق
أملأ كأسك واصبر دقايق
مجلسك مفهوم شوفه رايق
عقده ناقص زول ولا تام
من فتيح للخور للمغالق
من علايل ابروف للمزالق
قدله يا مولاي خافي حالق
بالطريق الشاقه الترام
ما يئسنا الخير عوده سايق
الحي يعود ان أتي دونه عايق
الي يوم اللقا وانت رايق
السلام يا وطني السلام
 
*******
 
في الضواحي وطرف المداين للشاعر خليل فرح
 
*******
 
في الضواحى وطرف المداين
يلا ننظر شفق الصباح
قوموا خلو الضيق في الجناين
شوفوا عز الصيد في العساين
يله نقنص نطرد نعاين
النهار أن حر الكماين
كلبي يا جمجوم أصله خاين
شوفوا كيفن يبرأ الملاين
هب شال وكشح المراح
للقنيص الخيل خف راسن
نحن ما بنخاف من مراسن
المكارم غرقنا ساسن والمجاهل
مين غيرنا ساسن
ان عطشنا نمز مر وآسن
وأن عشقنا بنعشق محاسن
فى المحاسن كفي يومنا راح
في الخميلة انجلت المحاسن
عيني حايرة ومشي قلبي جاسن
بعض حسنك هي يا محاسن
الحرير حين قدميك داسن
والزهور حين شفتيك باسن
والغصون من لدنك مياسن
والنسيم فاح بكر الملاح
يا الطبيعه الواديك ساكن
ما في مثلك قط في الأماكن
يا جمال النال في ثراكن
ياحلاة البرعن أراكن
في قفاهن تور قرنه ماكن
لا غشن لا شافن مساكن
في الخزام والشيخ والبراح
شوف صباح الوادي وجماله
وشوف خضاره وصيده ورماله
شوف يمينه وعاين شماله
شوف نسيم الليل صاحي ماله
شوف فريع الشاو مين أماله
القمر خجلان من كماله
والصباح لا بهل الوشاح
يا أم لسانا لسع معجن
كلمة كلمة وحروفه ضجن
ديل خدودك غير داعي وجن
ديل عيونك من غير سبه لجن
ديل دموعك من نظرة شجن
ده دلال ايه ده دلال معجن
محن الامات يا رداح
ماك نسيم الليل بي برودك
نامت الازهار فوق خدودك
غرد العصفور فوق عودك
النفوس ما اتعدت حدودك
ما عرفنا عدوك من ودودك
بس أنا المقسوم لي صدودك
يا حياتي وأملي اللي راح
 
 
*******
 
 
فلق الصباح للشاعر خليل فرح
 
*******
 
 
فَلَق الصباح قـول لى
أهـو نورك لاح خِلِّى
يا خفيــف الــروح
هــو هـــذا نـداك
أم نــدى الأزهــار
من جنان رضـوان أصلك
لـذا كـل ربيع فصلك
اتـنـفــس فــوح
تتـنـفــس نـــاس
وريـــاض وبحـــار
ما ألذّ نسيـم وصلــك
مـا رأيت يا جميل مثلك
يـا بليــل السُّــوح
هــو هـــذا نــداك
أم هـوى الأسحــار
أنت روضة وليك زهرة
وله كوكب وليك بهرة
ضمخــوك للجبيــــر
زعفران وعبيـــر
إنتَ نـار فـى بهــار
صَبّـغْ الخـدين حُمرة
بعد ساعة بتشوف صفرة
الاصفـرار ده كتيـر
أخجلـوك يـا أميـر
ولّــه نُمّــت نهـار
صبح البُستـان شايل
شجـر الرمـان مايل
السُــلافْ فى الدِنـــان
والكنـــار فى حنـــان
والهِــزار فى هِــــزار
إنتَ كالطـاووس خــائـل
كبرياءك وفيـك خــايل
انـزل انـــت كمـــان
غـّن قـول يـا زمـــان
ويـــن حبـيـبــى آذار
مــا عرفنا عدوك زاهــل
ولَّـه لِسَّـه غُـــلام جاهل
مُتَهـــلل صيـــــف
شِتـــا عنــدك كيـــف
فــى اللـــعب بالنــار
فـى لهيبــك أشـوف ساحل
كالفــراشة أجيــك راحل
أنــا خــــايف كيـــف
يــا لطيـــف الطيـف
أهــوى وابقــى فـى نــار
فلــق الصبــاح نّـــوَّر
لــى نحــور الغِيــد صَـوَّر
جميعَـــنْ فـى الـــدور
مِــن خــدود وبـــــدور
صَــدَفَـــه و مُحَّـــارْ
عَـزَّة شُـوفى الحــوش نوَّر
بــى نجــوم الليـــل غَـوَّر
يـــا صبــاح النــــور
علـــى العيـــون الحـــورْ
والخـــديـــد الحــــار
عَــزَّة قـومى كفـاك نـومك
وكفــانــا دلال يـــــومكْ
إنـت يــا الكبـــرتــوك
البنـــات فــاتــــــوكْ
فــى القطــار الطـــار
عــزَّة شُـــوفى شبــاب قــومكْ
سبقـــوك علـــى كــومك
بـــت رجـــــال ولــــدوكْ
للقبيــــلة هـــــــدوكْ
إنـــت عِـــزْ وبَطَــار
الجمـــالْ فـى كمــــال وصفك
أدبِــك وجمـــال خِلْفــــك
الضميــــــــر كالعــــــودْ
والعيـــــون السُّـــــــود
فى البطـــانة كُتـــــار
منزلــك عُنْـــــوان ظــــرفك
نــوريـــة يَصــون إلفــــك
زَعَلِــــكْ يــا أم خــــــدود
سَــــوِّى ليــــه حــــدود
مِنُــــه يــا سَتَّــــار
 
 
 
 
 
 

 

قم بكتابة اول تعليق

Leave a Reply

لن يتم نشر بريدك الالكتروني في اللعن


*